Leikskólinn Barnaból 

Nýja leikskólalóðin okkar er stórglæsileg og iðar hún af lífi þessa dagana. Börnin brosa hringinn og það er yndislegt að fylgjast með gleðinni sem ríkir á svæðinu. Lóðin er mjög fjölbreytt og þar er svo sannarlega eitthvað í boði fyrir alla.

Hönnunin býður upp á frábæra blöndu af náttúrulegu svæði og tilbúnum tækjum. Þessi samsetning hvetur börnin til að skapa tónlist, æfa jafnvægið, nota ímyndunaraflið, efla styrk sinn og örva skynjunina á fjölbreyttan hátt. Svæðið á að vera skemmtilegt þegar sólin skín en hönnunin gerir líka ráð fyrir miklu fjöri þegar snjórinn mætir á svæðið.

Á lóðinni er fallegt landslag og spennandi möguleikar til útieldunar sem bjóða upp á skemmtilegar samverustundir. Einnig er þar stórt hellulagt svæði sem í framtíðinni á að hýsa flotta útikennsluaðstöðu/gróðurhús. Það er mikill spenningur í loftinu og við hlökkum mikið til að nýta þetta flotta svæði enn frekar til náms og leiks á komandi misserum. Við hvetjum ykkur öll til að kíkja við og skoða þetta glæsilega svæði með börnunum ykkar!